港聞

港聞二

【Emily】何君堯未收口 稱尊重唔代表要推動 葉劉撐同志運動會 慢必畀讚

【明報專訊】同樂運動會明年會喺香港舉行,係亞洲區首次取得主辦權。不過,多名建制派議員包括何君堯日前喺立法會上反對,仲話擔心會推動同性婚姻合法化,得新民黨主席葉劉淑儀力排眾議。立法會前議員邵家臻噚日引述已「出櫃」、正因民主派初選案還押嘅立法會前議員陳志全(慢必),話慢必準備寫信畀葉太,讚賞葉太發言支持同樂運動會。葉太就向傳媒表示,好高興得到陳志全認可,話香港應協助同樂運動會舉辦,引證香港係共融、多元城市。

指五眼聯盟接納同志變屎眼聯盟

何否認冒犯:你自己對號入座

何君堯前晚喺網上話「五眼聯盟」國家接納同志運動後變成「屎眼聯盟」,噚日被問到係咪冒犯同性戀者,佢反駁「唔會,你自己對號入座」,又話「五眼聯盟」睇唔清楚嘢,有眼無珠。

何君堯又向Emily強調自己「春江水暖鴨先知」,因為「Gay Games就係推動同性婚姻嘅最大推手」,認為同樂運動會係前哨。佢話,尊重每人嘅性傾向,但唔代表要推動、鼓勵,「唔幫助唔等於歧視」。

而葉太就認為何君堯嘅「屎眼論」係歧視語言,平機會應該予以譴責。

相關字詞﹕何君堯 同樂運動會 葉劉淑儀 陳志全

上 / 下一篇新聞