港聞

港聞二

【Emily】孔聖堂辦講座 重現文化交流

【明報專訊】有86年歷史嘅一級歷史建築銅鑼灣孔聖堂,上世紀中係著名嘅文學活動聚腳點,唔少著名作家、學者都曾經喺呢度講學,例如蕭紅、錢穆、郭沫若等。為咗重現當年文化交流嘅盛况,孔聖堂上星期六(5日)搞咗一場國學講座,由孔聖堂創辦人嘅後代簡永楨、歷史學者丁新豹等做嘉賓,講述孔聖堂嘅前世今生同往後嘅發展路向。主辦單位話,當日有近200名嘉賓出席,包括文物保育專員蔣志豪、古物諮詢委員會主席蘇彰德等。

孔聖堂堂董會主席溫偉麟話,希望傳承儒學同貫徹社會責任,又話特別需要向年輕人講解「唯善」嘅重要,未來計劃舉辦多場講座,包括由體育、演藝、文化及出版界立法會議員馬逢國主講嘅「十四五規劃中香港定位」、丁新豹主講嘅「銅鑼灣歷史足迹」,同埋天文台前台長岑智明主講嘅「氣候變化三世書」。

相關字詞﹕孔聖堂 孔聖堂中學

上 / 下一篇新聞