港聞

港聞二

【Emily】派4000白Tee 田北辰提議DIY爸爸節禮物

【明報專訊】今個月20號就係父親節,經營時裝品牌G2000嘅實政圓桌立法會議員田北辰噚日喺facebook話會送出4000件白色T恤,畀大家拎番去DIY,設計一件專屬T恤送畀爸爸,市民可以到佢嘅議員辦事處領取。田二少喺相中都著咗件自家製T恤,上面寫住「Best DAD」(最佳爸爸),仲畫有一個頭戴皇冠嘅男人頭像,二少都舉起手指公like爆。

「我留意咗自己好耐 係有啲幽默」

為咗宣傳活動,田二少喺facebook出post,話自己身穿白T恤走去中環海濱,同動態懸空雕塑《川流不熄》合照打卡。雕塑似一條彩色嘅河,佢話諗起一個WhatsApp貼紙,就係佢做手勢叫人「繼續吹」。有網民留言話二少好搞笑,二少回覆話「我留意咗自己好耐,係有啲幽默」。

喺呢件藝術裝置下,田二少話諗到唔同人各有願景:搞創作嘅朋友希望靈感川流不息;從政者希望社區服務川流不息;好多香港市民想疫情快過,工作收入川流不息,但作為爸爸,佢最希望家人之間嘅愛川流不息。

相關字詞﹕父親節 田北辰

上 / 下一篇新聞