港聞

港聞二

【Emily】Ig頭炮遊戲 紫荊黨一度刪帖 話「技術問題」 再現後有留言消失

【明報專訊】紫荊黨本周二(8日)開咗個Instagram帳戶,話係「香港首個貼地政黨上線」,仲推出有獎問答比賽,頭炮係估吓全國政協副主席、前特首梁振英會否再選特首。不過,紫荊黨個Ig出完個post半日,就連聲稱係「首個貼地政黨上線」個post都全部收起;至深夜喺Ig限時動態話係技術問題,之後啲post重現番。Emily發現,紫荊黨Ig「小編」有啲回覆已被刪除,例如有網民留言「冇獎問答遊戲,小編點睇『光復香港,時代革命』?」,紫荊黨原本回覆「國安法,尷尬」,帖文重出後呢個回覆已唔見影。

究竟係咩技術問題搞到要一度收起啲post?紫荊黨創辦人之一兼發言人黃秋智「已讀不回」Emily。咁紫荊黨呢個策略吸唔吸引到網民呢?佢哋Ig帳戶開咗兩日粉絲人數不足600,叫大家投票估梁振英會否再選特首嘅post就有約300個留言。

建制網媒批「惡搞post呃like」

建制背景網媒「橙新聞」前晚刊登一篇評論,批評係紫荊黨嘅「貼地」係做惡搞post來呃like,「靠『惡搞』來建黨,實在和他們一直號稱要給社會帶來建設性之類的政治口號並不匹配,令人失望」。

相關字詞﹕網上投票 特首選舉 梁振英 紫荊黨

上 / 下一篇新聞