港聞

港聞二

【Emily】謝偉俊倡重設夏令時間 張建宗:冇乜益處

【明報專訊】如果香港夏天撥快1個鐘,大家又贊唔贊成呢?立法會議員謝偉俊噚日問,香港可唔可以好似以前咁,實施夏令時間,即提早一個鐘返工返學,話可以充分利用日照、節約能源,同埋推動經濟復蘇。不過,政務司長張建宗似乎唔多同意,話𠵱家未有證據顯示夏令時間可為香港帶嚟啲咩好處。

謝偉俊書面提問,話香港經濟接連受「黑暴」同疫情打擊,加上溫室效應加劇下,香港今年錄得1963年以嚟最高嘅5月氣溫。佢話實施夏令時間可鼓勵大家早睡早起,除咗可以減少照明、讓市民用朝早較清涼時段返工返學,早咗收工仲可以做戶外活動,又可以增加零售店舖、食肆嘅晚市客流,令經濟快啲復蘇,叫政府研究吓夏令時間係咪更切合市民起居同埋機構營運。

張:不利經貿交流

張建宗就回覆話,夏令時間用嚟配合夏天時太陽提早東升嘅自然現象,通常喺緯度較高,冬、夏季日照分別明顯嘅地區先會實施,但香港屬低緯度,日頭時間長短喺冬夏之間嘅變化並唔明顯。佢又話,夏令時間對香港冇乜社會經濟益處:市民返工返學時間冇縮短,唔太影響室內能源消耗;而令內地同香港部分時間有時差,更不利經貿交流。

相關字詞﹕夏令時間 張建宗 謝偉俊

上 / 下一篇新聞