港聞

港聞二

【Emily】新民黨推百萬抽獎畀自己友 葉劉捐鑽勞谷針

【明報專訊】商界響應政府提供接種新冠疫苗誘因,推出打針送樓、送金等抽獎,新民黨噚日亦宣布送出總值100萬元獎品作大抽獎,畀黨員或「新民之友」參與。新民黨主席葉劉淑儀捐出喺1991年出廠、當時價值1萬美元(約7.8萬港元)嘅勞力士鑲鑽石腕表,佢話隻表係當年做政務官時升職買嘅。𠵱家已轉戴智能手表嘅葉太話,希望鼓勵市民打針保障健康,提升本港競爭力。

大抽獎參加者須年滿18歲同打咗兩劑疫苗。抽獎本月29日起接受申請至8月底,7月、8月及9月各有一次抽獎活動,每人最多可中獎3次。

葉太捐出私人珍藏嘅勞力士表係18K金原裝表面,鑲咗鑽石,佢感謝勞力士協助打磨同檢查零件,並贈送禮盒。Emily問起隻表有咩來頭,葉太話係當年升任首長級乙一級政務官時買嘅。佢又贈送價值4萬元嘅匯豐150周年紀念鈔,由於唔可以直接捐鈔票,會由善長購入,轉為捐贈4張價值1萬元嘅購物券。其他獎品包括50份體檢套票、咖啡禮券、1000張本地遊套票等。

係咪選舉工程頭炮?

葉劉:你諗太多

被問到捐獎品係咪特首選舉工程「第一炮」,葉太回應:「你諗得太多,市民、選委好聰明,唔會因為咁投票。」

相關字詞﹕新民黨 疫苗抽獎 勞力士 葉劉淑儀

上 / 下一篇新聞