港聞

港聞二

【Emily】反修例兩年 在囚者政界互打氣 李卓人:沒放棄就沒輸

【明報專訊】兩年前嘅6月9號,大批市民上街反對政府修訂《逃犯條例》,香港從此不一樣。多名參與反修例運動者噚日都有出帖回顧呢場運動,其中喺獄中嘅職工盟李卓人,其fb出帖話,雖然失望和無力感充斥呢個城市,但「有一點要始終堅信,只要沒有放棄,我們就沒有輸。這場抗爭以不同形式還在繼續」。佢又以日前六四晚情况為例,「我們雖以自己方式悼念,卻展現了香港人面對打壓仍不退縮的共同堅持」。

陳皓桓:石在火種在

另一在囚者、社民連吳文遠,其fb上載佢入獄前拍嘅短片,話縱使𠵱家未能上街,好多人被關進牢房,但「千萬、千萬、千萬不要放棄」。佢話2014年雨傘運動後數年,民陣七一遊行參與人數較少,但數年後市民再醒覺上街,佢形容自己天真,「相信邪不能勝正,好人一生平安,壞人終需有報應的,要還的,要落地獄的」。

同在獄中嘅民陣召集人陳皓桓嘅fb就貼出兩年前遊行相片,留言勉勵支持者,「知道牆外的大家頂得辛苦。石在火種在,香港人加油!」

流亡英國嘅羅冠聰就話,回過頭看,當然一切似鏡花水月,而佢認為「如何將創傷撫平、癒合,就是我們接下來的功課」,籲大家要有與負面情緒和好嘅準備,要先照顧好自己。有官司在身嘅民主黨主席羅健熙則翻舊帳,話兩年前市民上街,但政府回應係繼續修例,而建制派又表態支持,叫大家唔好忘記(Never forget)。

相關字詞﹕吳文遠 民陣 李卓人 反修例2周年

上 / 下一篇新聞