港聞

港聞二

【Emily】大埔區會內訌 「機場大叔」辭小組主席

【明報專訊】商舖阻街問題各區都有,喺大埔區議會就引起一場小風波,令兩個非建制議員內訌,有人更不滿到辭埋區議會嘅小組主席𠻹。話說該區「環保、漁農、工商、食物及衛生委員會」(下稱「環漁會」)轄下設「跟進大埔商舖引致阻街/環境衛生問題工作小組」(下稱「工作小組」),不過,工作小組主席陳振哲喺facebook話,因環漁會主席劉勇威繞過工作小組處理有關工作,認為係全盤否定工作小組嘅存在,故決定辭去工作小組主席一職,仲話「懂得甚麼是尊重嗎」、「基本政治倫理」。

Emily問過劉勇威,佢解釋,大埔街市一帶較多環境衛生問題,食環署邀請佢以環漁會主席身分到現場視察,佢亦發電郵予環漁會委員睇吓大家有冇興趣;其後陳振哲就搵秘書處,話自己被繞過、要求撤回電郵但劉勇威拒絕,於是陳辭任。劉勇威質疑陳振哲點解向秘書處要求撤回電郵,話覺得離譜。

環漁會主席被指架空小組 劉勇威稱食環邀視察

有「機場大叔」之稱嘅陳振哲就向Emily表示,佢本身都同各政府部門開會溝通當區有關問題,但喺不知情下,劉勇威電郵大家到場視察,佢認為呢個行為本身代表對方有意收回職權。陳振哲解釋,委員會主席如果想自行跟進議題,工作小組好難運作;又話如果食環署約劉勇威,劉應向對方說明有專責小組負責。

相關字詞﹕衛生 大埔 食環署 區議會

上 / 下一篇新聞