港聞

港聞二

【Emily】紫荊黨開Ig 話有「高質蛇齋餅糉」

【明報專訊】近日無咩動靜嘅紫荊黨,前日開咗Instagram帳戶,宣布「​香港首個貼地政黨上線啦」,仲話準備咗一啲豐富嘅「高質蛇齋餅糉」,今日會推出第一個有獎遊戲。該黨創辦人之一兼發言人黃秋智同Emily講,活動旨在同市民互動,任何人都可以透過Ig專頁參與,至於獎品係乜就要先「賣關子」。

紫荊黨喺首個Ig post中,話聆聽到市民厭倦本港「制式化又忽略年青人嘅政黨」,所以成立就係為咗打破傳統,「塑造一個香港最貼地、互動性最高、緊貼年青人嘅政黨」,請大家密切留意之後嘅一連串活動。

黃秋智話,黨內嘅青年黨員非常有創意,佢都覺得將會舉行嘅活動好有趣,透露會同參加者互動,舉例可能會叫人競猜「誰是下任特首」。至於紫荊黨近日發展,黃秋智話會員人數慢慢增加,目前正處理幾百個入黨申請,正式黨員就有超過100人,成員包括公務員、學生、教師等。佢並透露上周同新界總商會見面,正逐步接觸香港唔同階層。

相關字詞﹕蛇齋餅糭 紫荊黨

上 / 下一篇新聞