港聞

港聞二

【Emily】派自家種蘆薈 元朗議員:好搶手

【明報專訊】區議員成日都有「蛇齋餅糉」派,而元朗區議員陳敬倫噚日喺議辦派嘅嘢就比較有心思——就係佢自己喺屋企天台種植嘅新鮮翠綠蘆薈(圖)。佢話今次產量唔錯,收割後包裝成100條畀街坊拎,好受歡迎。

質疑民署乜都要管

民政事務總署日前向幾十個區議員發警告信,話佢哋喺六四前派蠟燭,同區議員職務不符,陳敬倫亦收到信,唔知會否被扣減議辦津貼。陳敬倫質疑民政總署喺《港區國安法》生效下交吓功課,證明自己有做嘢。佢話去年有蠟燭派剩,今年放喺議辦畀人攞,並無宣傳任何活動,覺得咁都要管係無必要。佢話,唔少議員都會不時派吓「蛇齋餅糉」,嚴格嚟講佢派蘆薈,政府都可以話同議員職務無關,但其實呢啲工作係議員同街坊嘅一種聯繫,亦可惠及街坊。

講番啲蘆薈,陳敬倫話喺天台種植,花盆喺垃圾站收集番嚟,利用自家廚餘堆肥,而蘆薈其實好易種,擺入盆內就會生長。佢對蘆薈食療做咗啲研究,話蘆薈有消炎效用,自己喉嚨痛時會用冰糖煮蘆薈,食咗就紓緩到,唔使睇醫生。佢話遲啲會搬新屋,有塊小農地,計劃開墾種瓜,冀有收成時又可以同街坊分享。

相關字詞﹕區議員 港區國安法 六四32周年 陳敬倫

上 / 下一篇新聞