港聞

港聞二

【Emily】「TAMA TAXI」義載家屬探手足

【明報專訊】部分監獄遠離市中心,囚友家屬去探監都要花唔少時間。關注囚權組織「石牆花」噚日喺facebook話,的士台「TAMA TAXI」自發推出「伴你同行」家屬探監支援計劃,為手足家屬提供往返收押所或監獄嘅義載服務。

根據宣傳海報,如在囚者因社會運動而入獄,家屬可免費使用義載服務,此前需透過Telegram申請。「石牆花」形容,只要每人自發多做一啲小事,「就可以減輕在囚手足及家屬承受冤獄的痛苦」。

民主黨尹兆堅因民主派立選初選案正還押,喺收押所中已度過百日。阿尹嘅fb噚日刊出獄中來信,話自己從寒冬走到盛夏,但被關押喺密不見光嘅牢房中,「若不聽電台的新聞報時,是很容易在黑暗中失去時間觀」。

阿尹:牆內夠人 牆外更需要你們

阿尹喺信中問,究竟仲需要面對幾多個獄中「一百日」,「一百日之初是孤單、是恐懼、是絕望……但日子過後發現,原來在黑暗中更能看清真相」,話政府禁止唔到民意同人心。佢最後請牆外嘅人保重身體,「牆內夠人,牆外更需要你們存在和貢獻。應承我,留在牆外做事,好嗎?」

相關字詞﹕初選 尹兆堅 石牆花

上 / 下一篇新聞