港聞

港聞二

【Emily】馮檢基搞網台 話唔得閒諗參選 拍歷史環保飲食節目

【明報專訊】距離新選舉制度下嘅立法會選舉仲有半年,民主黨未決定會否派人參選,社民連日前就已表明唔會選。立法會前議員馮檢基(基哥,圖)噚日就話,近排忙緊籌備網台,預料嚟緊半年都要專心經營,「唔得閒諗(參選)」,但又話政治上永遠唔會說不。

基哥話,有感網絡平台嘅影響力愈來愈大,上年4月起開始籌備名為「UPmedia」嘅網台,屆時佢會自己主持時事節目,亦搵咗幾個無綫或亞視前製作人員幫手,拍啲關於歷史文化、環保、飲食等唔同類型嘅節目,仲話日後會同其他網台合作培訓KOL,預計呢一兩個月就會正式開台。佢話,希望做到無預設立場、運作自主嘅媒體,亦強調唔會違反《港區國安法》。

話有建制同佢講「今次有機」

臨近選舉開台,係咪為選舉鋪路?基哥就話,同兩個拍檔早喺一年前就籌備,當時連實際選舉係幾時都唔知,又話公司始終啱啱開波,大家夾埋投資咗幾十萬,預料每月營運開支少於6位數,佢希望嚟緊半年至9個月可以回本同賺到錢,透露未開台已接洽咗兩三個工作,「拍檔唔係諗住我去做議員」。

基哥承認,一個月前有建制派游說佢參選,同佢講「今次有機會」,但佢就話現階段實在無時間諗。

相關字詞﹕立法會選舉 馮檢基

上 / 下一篇新聞