港聞

港聞二

【Emily】考察新界北 立會扑槌搭直升機

【明報專訊】立法會發展事務委員會將於6月22日考察新界北新發展區,話說早前政府建議,今次考察可以揀搭直升機高空視察,以及陸路搭車考察,根據立法會文件,今次考察最終係會乘坐直升機視察。熱血公民鄭松泰就喺facebook表示,據佢所知得佢一個人選擇揀坐車考察,但佢都唔明點解要坐直升機,認為搭直升機好似權貴,所以決定唔參加。鄭松泰仲話「搵日坐單車去,有無人陪我」。

鄭松泰話得佢揀搭車

根據政府早前向議員提出嘅視察方式,高空考察係搭直升機、以較寬廣角度視察新界北新發展區及附近一帶情况,全程約1小時15分鐘,包括飛行時間約35分鐘,以及飛行安全準備、考察講解等時間;至於陸路視察就歷時約4小時,因為新界北新發展區佔地千多公頃,主要會喺車上沿路視察車外環境。

考察活動原定6月1日下晝進行,會視察包括新田/落馬洲發展樞紐、新界北新市‍鎮及文錦渡物流走廊,後來因天氣關係延遲,噚日立法會就出文件畀議員,話喺22號舉行。

相關字詞﹕新界北新發展區 考察 直升機 立法會

上 / 下一篇新聞