港聞

港聞二

【Emily】何君堯:委法官要諗政治含意

【明報專訊】英國最高法院前院長何熙怡女男爵早前表明唔會續任終審法院非常任法官,立法會資深司法任命建議小組委員會噚日開會,討論任命高院上訴庭副庭長林文瀚為終院法官,但建制派議員借題發揮。何君堯批評,香港以往信賴外國作為合作伙伴,但反修例風波後,外國包庇香港嘅逃犯,「反起豬肚係屎㗎喎」,認為委任法官都要考慮政治含意。

何君堯又質疑點解終院案件必須有非常任法官參與、唔增加常任法官數量;話如果海外非常任法官全部辭職,點平衡風險。司法機構政務長梁悅賢解釋,終審法院邀請嘅海外法官,都係普通法地區頂尖嘅,吸納外地司法經驗對香港有好處。

民建聯周浩鼎就質疑何熙怡藉辭職抹黑、誣陷香港,「對我哋好唔公道」,希望將來挑選海外非常任法官時了解清楚對方背景,唔應該捲入政治。

梁美芬提議搵星馬法官

經民聯梁美芬就建議,可以搵嚟自新加坡、馬來西亞嘅法官做非常任法官,又批評外國政客、政府會赤裸裸干預司法人員判斷,佢對此感到遺憾。

相關字詞﹕梁美芬 何君堯 終審法院 反修例風波

上 / 下一篇新聞