港聞

港聞二

【Emily】入獄前拍定片 吳文遠同阿尹賀壽

【明報專訊】還押中嘅民主黨尹兆堅噚日52歲生日,係佢首次於獄中過生日。阿尹一對十幾歲嘅仔女前日去荔枝角探爸爸,祝爸爸生日快樂,仲喺探監房跳起「生日舞」,𧨾得老竇笑到「見牙唔見眼」。除咗阿尹家人,社民連秘書長吳文遠就喺自己入獄前拍咗片,隔空同阿尹賀壽兼打氣。

仔女跳生日舞 𧨾到阿尹大笑

阿尹嘅facebook噚日出帖,話以往每當屋企人生日,佢都會去街市買海鮮親自下廚,但今年已難以做到。尹太3月初生日時撞正民主派立選初選案「馬拉松式」提訊,連食三文治嘅時間都未必有。

fb小編:吳文遠其實係暖男

吳文遠就好有心,佢上月因未經批准集結案入獄,但此前預先拍片,同阿尹講生日快樂,片段噚日上載facebook。文遠提醒大家寫信寄畀阿尹,話對方「仔細老婆嫩」,相信家人承受好大壓力,呼籲公衆訂閱阿尹嘅Patreon,或者捐錢畀民主黨,「幫得幾多得幾多,守望相助,希望我哋大家可以好快出來,可以互相擁抱、見面」。文遠嘅fb小編話,文遠睇落粗枝大葉,其實係暖男。

相關字詞﹕民主派初選案 吳文遠 尹兆堅

上 / 下一篇新聞