港聞

港聞二

【Emily】接「救生員游水」投訴 譚香文出post吸「嬲」逾千

【明報專訊】黃大仙區議員譚香文前日喺facebook出帖,話有街坊見到屋苑泳池嘅兩名救生員,一個清潔泳池時,另一人喺度游水。譚香文話接到投訴後已通知管理處跟進,如果屬實,可能要換走游水嘅救生員,仲hashtag「#做事要專業」。帖文吸引逾千個「嬲嬲」、近2000個「哈哈」反應,有網民質疑救生員游水有咩問題,仲有人話「唔該用下(吓)腦啦,唔通消防員打排球你都要投訴」。

管理處話屬當值行為不當

Emily向譚香文查詢,點解救生員游水係不當行為,佢無直接回應,只係話已將個案交畀物業管理處。譚香文噚日再出帖,張貼管理處嘅回應通告,上面寫話會所職員巡查及調查後,證實個別救生員喺當值期間行為不當,已經口頭警告嗰名救生員。

工會:救生員唔會行喺水度

港九拯溺員工會發言人胡啟榮同Emily講,就住張相而言,救生員游緊水唔代表唔係工作當中,可能睇緊邊度有污糟,「救生員唔會行喺水度,喺水就一定會游」。佢仲話,就算真係游緊水,都係鍛煉體能,有助保障泳客安全,唔明點解構成不當行為。

相關字詞﹕救生員 譚香文

上 / 下一篇新聞