港聞

港聞二

【Emily】阿牛設「街坊民主牆」 地署指違規

【明報專訊】多名區議員喺六四前派蠟燭、舉行「熄燈一小時」等活動,遭民政事務總署警告。社民連東區區議員曾健成(阿牛)喺區內設「街坊民主牆」,上面貼上「人心不死 燭光不滅」、「毋忘六四32週年」字樣,佢喺facebook出帖,透露接到地政總署信件,認為佢展示嘅宣傳品不符指引規定,食環署會移走。

食環會移走 阿牛促交代

阿牛表明,民主牆係為畀區內居民表達意見,將去信當局,要求交代乜嘢內容違反指引、移除嘅仔細原因,不排除採取追究行動。

西貢議辦遭秘書處突擊檢查

西貢區議員陳嘉琳噚日就喺fb發相稱被區議會秘書處職員「突擊檢查」,引述對方話因接到市民投訴,話佢議辦並非作「區議會用途」。陳上周五(4日)接到民政處信件稱,收到投訴指佢進行與區議會無關嘅活動,影響地區和諧、可能犯法,包括喺5月27日派蠟燭。

翻查資料,民政總署六四前夕發稿,話接到投訴有區議員進行無關區議會工作嘅活動,包括派物資、發表宣傳信息、鼓勵及協助公眾參與未經批准集會,明言所有執行與區議會無關職務嘅開支將不獲發還;其後多名區議員都接到當局嘅信,話佢哋進行與區議會無關嘅活動。

相關字詞﹕民主牆 民政事務總署 食環署 區議會 六四

上 / 下一篇新聞