港聞

港聞二

【Emily】旅發局虛擬藝術工作坊宣傳香港

【明報專訊】今個5月本港舉辦多項藝術盛事,包括月底喺會展舉行嘅「巴塞爾藝術展」。但疫情持續下,香港仲未恢復正常通關,外國旅客好難親身嚟香港。為咗維持香港嘅國際曝光率,吸引遊客疫情之後嚟香港,除咗「巴塞爾藝術展」有線上展廳,旅發局亦搞咗7場「虛擬藝術工作坊(''Sip Back and Sketch'' Virtual Art Class)」。

旅發局話,呢個別開生面嘅工作坊有大約230個來自內地、東南亞、日韓、澳紐、美加等地嘅記者,同一啲「超級香港粉絲」參加,一邊欣賞靚景靚畫,以維港做背景畫吓近年大熱嘅「禪繞畫」;一邊參加實時導賞團,同主持「參觀」香港藝術館、西九龍文化區等,深入了解香港嘅藝術文化。

旅發局又話虛擬工作坊嘅宣傳成效唔錯,有200個社交媒體分享,接觸率達450萬,全球宣傳效益超過3900萬元𠻹。

上 / 下一篇新聞