港聞

港聞二

【Emily】區議員擺街站 為印度籌款抗疫

【明報專訊】印度每日仍有逾10萬人確診新冠病毒。一班民主派區議員同在港印度人領袖,一連兩周周末喺港九新界擺街站,為灣仔錫克教廟籌款,目標係籌得300萬元,購買物資畀印度嘅錫克教廟,分發畀有需要嘅人。

目標300萬 購物資畀印度錫克廟

被問到市民反應如何,油尖旺區議員、民主黨曾自鳴同Emily講,噚日擺街站最少籌到3000、4000元,前日反應感覺就冇咁好,不過整體而言,如果每區數字都差唔多,相信最終籌得款項都可觀。咁會買乜嘢物資?曾自鳴話要睇吓籌得款項再決定,因應印度當地氧氣供應不足,佢哋其中一個目標係購買製氧機等設備。

曾自鳴話擺街站期間,有巴基斯坦裔街坊本身行過咗街站,但特意回頭,話雖然唔係自己國家同胞有事,但都想幫手,形容佢哋行動好有意義;亦有街坊特意由大角嘴走到旺角搵佢捐錢,另外都有唔少印度裔街坊響應呼籲,捐款支持同鄉。

上 / 下一篇新聞