港聞

港聞二

【Emily】港台再調節目 《給香港的信》取消

【明報專訊】香港電台再出現節目調動。過往逢星期日朝早8點15分喺港台第三台(英文台)播放嘅節目《給香港的信》(Letter To Hong Kong),噚日起正式取消,轉為另一節目《#Hashtag Hong Kong》。港台網頁話,新節目會更新《給香港的信》嘅舊有格式同內容。

更新格式變《#Hashtag Hong Kong》

港台回覆Emily確認,《#Hashtag Hong Kong》係港台第三台推出嘅全新節目,逢星期日朝早8點15分播出,取代原有節目《給香港的信》,節目會關注公民社會議題,畀非政府組織、法定組織同非牟利團體等發表意見,亦會播出嘉賓選播嘅音樂或歌曲,令節目內容更豐富。

至於更換節目原因,港台話節目編排同調動屬機構正常運作,會適時製作唔同節目,以配合港台作為公共廣播機構嘅目的同使命。

《給香港的信》曾經涉及爭議,4月初原定播出屯門區議員巫堃泰寫畀一名還押者嘅信,信中引述《孤星淚》歌詞,但最終節目被抽起,改為播放港台顧問委員會前主席陳建強書寫嘅內容。而最後一集《給香港的信》,就搵咗蘭桂坊集團主席盛智文寫信分享。

上 / 下一篇新聞