港聞

港聞二

【Emily】籌款超標 鴿黨可捱到明年底 「如果資產無畀政府凍結」

【明報專訊】民主黨賣獎券籌款活動日前結束,Emily向該黨籌款委主席袁海文打聽,佢話賣獎券反應好好,早已超過籌400萬元嘅目標,但仍然要等埋數。袁海文話民主黨已做好過寒冬預算,話目前盤帳雖然今年仍有營運赤字,但估計夠錢捱到至少明年底。但佢補充多一句,「如果資產無畀政府凍結」。

民主黨立法會議員總辭,又有多名黨友還押,唔少黨員有多條控罪在身。袁海文話民主黨本來預計,賣獎券後今年度會有逾1000萬元赤字,但籌款反應好踴躍,獎券籌得金額超過400萬元預期,所以相信赤字數目會細一啲。佢話籌款章程講明,市民捐嘅錢會用作政黨運作,唔會拎嚟幫黨友打官司。民主黨早排變賣咗荔枝角嘅單位,有近1000萬元,主要作支援黨友訴訟等用途。

獎券籌款逾400萬 超預期

有民主黨中人話,近年未見過市民咁支持民主黨籌款,話現時政府禁制市民上街,但市民心中有火,亦睇到民主黨嘅表現值得支持,所以肯捐錢畀佢哋。不過,該民主黨人亦話,唔少捐錢嘅市民都叮囑佢哋今年唔好參選,對政府修改選舉制度好不滿。

捐錢市民叮囑今年唔好參選

袁海文亦話要積穀防饑應付持久戰,有人提議開源方法,例如搞吓網購賣紀念品,唔好淨係靠街頭籌款。

上 / 下一篇新聞