港聞

港聞二

【Emily】土瓜灣過渡房入伙 保留大樹變休憩區

【明報專訊】唔少非牟利機構積極籌建過渡房屋,協助輪候公屋嘅基層家庭改善生活環境。由九龍樂善堂負責、位於宋皇臺道同土瓜灣道交界嘅過渡房屋項目,首批合資格家庭今個月正式入伙。項目樓高3層,提供110個1至3人嘅單位(圖一),包括地下兩個無障礙單位,每個單位都附設獨立廚房、洗手間同浴室。

呢個項目係樂善堂首個租用政府土地、以「組裝合成」建築技術興建嘅過渡房屋,上年6月展開建築工程,今年2月下旬完成安裝所有組合模件,再做樓宇設備接駁、安裝、測試同申請入伙紙等工序。

九龍樂善堂總幹事劉愛詩話,興建今次項目最大挑戰係地盤中間有棵大樹,最初擔心會成建築限制,但經設計規劃後決定保留大樹,並喺樹同樓宇四周建綠化花圃區,令綠化空間佔整體建築面積達兩成,改善居住環境之餘,亦成為家庭共享休憩嘅地方。

樂善堂亦向政府申請彩虹彩興路一幅土地,將未來拆卸後嘅組合屋,搬去該幅土地重新組裝使用,項目已獲運房局撥款支持。

上 / 下一篇新聞