港聞

港聞二

【Emily】橫瀾島觸礁沉沒百載 新華輪終尋獲

【明報專訊】近代香港發生過唔少船難,其中一宗,係1929年招商局一艘名為「新華輪」嘅客貨船,喺位於香港東南面嘅橫瀾島北岸觸礁,造成340人死亡,貨船沉沒至今近百年,一直未被打撈或妥善保育。香港水下考古總會近年不時去橫瀾島搜尋新華輪嘅位置,直至上月中潛入28米深嘅海底,首次成功窺探新華輪真身,並確認船身基本完整。

水下考古會指船身基本完整

100年前由英國船廠製造嘅新華輪,1929年1月由上海經汕頭駛往香港海域,喺大風大浪下偏離航道,於橫瀾島北岸觸礁,但由於船上冇無線電通訊機,直至第二朝先有救援船抵達,最終導致340人遇難,僅26人倖存。水下考古總會主席胡名川翻查資料,顯示船難發生後,當年立法局曾討論加強海上通訊設備,足見意外嘅嚴重。

胡名川話,團隊以浮標基本確認位置後,潛落海底時,發現有不自然嘅珊瑚生長,其後確認係長滿寄生物嘅沉船船頭,但由於上個月橫瀾島海域能見度極差,加上風浪大,只夠時間探索到部分位置,希望等冬天吹東北風、水底較清激時再潛落海底,仔細探索同拍攝全艘船。

相關字詞﹕水下考古總會 新華輪

上 / 下一篇新聞