港聞

港聞二

【Emily】維港匯主角 盧維思有意選立會 話想下屆特首係新面孔

【明報專訊】立法會選舉年底舉行,投資推廣署前署長盧維思(Michael Rowse)喺民主黨劉慧卿節目《議會內外》中,透露自己正探索應否參選,形容都有人需要代表中間、溫和派別發聲。佢話正諮詢其他人,例如見過民主黨主席羅健熙;卿姐問佢有冇見過內地官員,盧維思就笑言睇吓你將(前特首)梁振英放喺咩類別,又話目前暫時未有「紅燈」,但如果有「紅燈」就唔使浪費大家時間。

有冇見內地官? 「睇你將CY放咩類別」

講到歷屆特首,盧維思認為,最大問題係港府喺回歸後未能學識處理同北京嘅關係。佢形容現任特首林鄭月娥唔係politician(政治家)、只係行政人員;梁振英就係politician,但佢唔明點解對方已位至國家領導人,仍想再度競逐特首,認為兩人都唔應該參選特首,希望下屆特首係新面孔。

盧維思透露20年前已放棄英籍,佢解釋,以往擔任投資推廣署署長,要周圍說服人投資香港、同人講香港係最好嘅營商地方;如果佢袋住英國護照,咁做唔係太自然,所以就改用特區護照。另外,佢都不點名批評民主派有人去信外國要求制裁係「大蠢材(big idiot)」,質疑背後係乜嘢政治思想。

盧維思是當年「維港巨星匯」風波主角。2003年SARS後港府辦維港匯,花費公帑1億,惟入場人數未如理想、安排混亂,公務員事務局對時任投資推廣署署長盧維思展開紀律聆訊,裁定佢失職並罰款。盧不服並提司法覆核,要求推翻當局決定,最終勝訴。

相關字詞﹕盧維思 劉慧卿 立法會選舉 立法會

上 / 下一篇新聞