港聞

港聞二

【Emily】「旅遊氣泡」改壞名? 邱騰華:如果改名處理到,當然最易

【明報專訊】香港同新加坡嘅「航空旅遊氣泡」兩度延期,成日畀人笑「最怕改壞名」。立法會金融界議員陳振英噚日喺立法會會議上就問起,點解香港搞咁耐,一個「氣泡」都搞唔成,仲有無同其他地方傾另外嘅「氣泡」;商務及經濟局長邱騰華就借機講,「好多人提及氣泡都擔心會爆,好多人建議改個名,如果改個名就處理到件事,當然最容易」,然後話氣泡唔係「吹番梘泡」,而係保護氣泡內恢復旅遊地方嘅人。

強調「唔會唔傾第二個」氣泡

邱騰華冇講「旅遊氣泡」係咪會改名,只係話會視乎新加坡社區爆發情况,了解香港衛生當局意見,希望可以早日開通。邱騰華又話,自上年中起,香港政府有同過歐洲、太平洋國家傾,但目前可以安心畀對方免檢疫來港嘅地方唔多,最令人安心嘅係內地或者附近地方,不過佢強調「唔會傾咗一個(氣泡)就唔傾第二個」。

相關字詞﹕邱騰華 旅遊氣泡

上 / 下一篇新聞