港聞

港聞二

【Emily】議員追問「社區對話」 林鄭考慮Zoom聽民意

【明報專訊】2019年香港爆發反修例示威,特首林鄭月娥承諾走入社區同市民對話,但舉行過一場實體「社區對話」後就不了了之。金融界立法會議員陳振英噚日喺立法會「短問短答」環節時「追數」,問林太會否復辦類似會議。林太回應話,官員一直同某啲社會界別Zoom meeting,會考慮開放呢啲視像會議。

陳振英話,理解2019年停辦「社區對話」嘅原因,話當年會場外秩序混亂,有發言市民遭「起底」,但問林太未來會否用Zoom聆聽民意。林太就認為Zoom meeting可以睇到與會者表情,對話非常有效,承諾考慮開放網上交流,聽取更多民意。

馬逢國倡設文化體育旅遊局

林太:唔排除架構需改變

另外,繼前特首梁振英重提增設文化局,體育、演藝、文化及出版界議員馬逢國噚日提出,港府應增設一個文化體育及旅遊局。林太回應話,唔排除架構係咪需要改變,但認為係屬於將來嘅事,重申即使無特定架構,政府都唔會對香港文化藝術發展鬆懈。馬逢國會後同Emily講,林太雖無正面回應,但覺得對方口風鬆咗,無一刀切拒絕成立新局。

相關字詞﹕文化局 社區對話 特首林鄭月娥

上 / 下一篇新聞