港聞

港聞二

【Emily】政府內部聘AO:滿足感「無可比擬」 16號截止 邀「崇高操守」者申請

【明報專訊】呢幾年公務員系統流失率高,政府早前公布上年度(2020/21)公務員辭職人數創23年新高,其中政務職系總流失率約5.21%,亦係近10年嘅高水平。公務員事務局噚日發信畀各部門公務員,邀請有興趣者申請政務主任(AO)職位。AO工作多元化,之前包括要做選舉主任DQ參選人等。公務員事務局常任秘書長楊何蓓茵喺信中力銷AO職位吸引,話「充滿無窮無盡的挑戰」,但可以「帶來無可比擬的滿足感 」。

公務員事務局長聶德權上月出席立法會會議話,過去一年有1860多名公務員辭職,其中包括21個AO。佢當時又話今年會喺凍結編制下,繼續招聘逾萬個位填補人手流失同新增職位後嘅空缺。

據Emily所知,政務職系噚日起至16號展開內部招聘,鼓勵「有崇高操守」等其他特質嘅公務員申請,「迎接事業上更大挑戰」,並會為有志者舉辦兩場簡介會,介紹AO嘅工作。

環境局推800個有時限職位

另外,環境局去年推出嘅「綠色就業計劃」,噚日宣布今年再推出800個有時限嘅環保相關職位,當中包括500個全職或兼職職位,歡迎唔同技能及學歷者報名,其餘300個大專畢業生資助項目職位,希望畀多啲就業機會佢哋,一齊推動環保。

相關字詞﹕環境局 政務主任 公務員事務局

上 / 下一篇新聞