港聞

港聞二

【Emily】區議員last day講感言 畢東尼:難忘同街坊齊抗疫

【明報專訊】立法會早前三讀通過公職人員宣誓修例,喺宣誓安排前,大批區議員辭職,唔少人近日last day都紛紛發表服務街坊感言。原為深水埗區議員、噚日「last day」嘅周琬雯話,好多人問佢之後有乜打算,佢都會答「其實冇」,自言上任時「點會預咗香港會咁快有咁大轉變」,佢感激街坊做佢後盾,不論喺網上、街站都錫住佢,甚至有街坊親身上辦事處同佢道別。

周琬雯感激街坊做後盾

原任觀塘區議員嘅陳嘉言,噚日就話公布辭職後收到好多街坊讚賞、祝福,佢認為觀塘好多區議員都比佢更努力。陳嘉言提到,任內接觸嘅公務員大多盡責,只係有時職能、制度所限,有啲事解決唔到,建議市民善用1823手機程式投訴,若有唔識處理嘅社區事務,可以搵佢問意見。

同樣原任觀塘區議員嘅畢東尼就話,前後5年任期時間唔算長,但已足夠同大家一齊創造深刻回憶,包括兩次區選、本地旅行團、海外旅行等,最難忘係同街坊一齊抗疫。佢話對於未能完成今屆4年任期,要向每個支持佢嘅街坊致歉,「雖然我未來不再是麗晶區議員,但我仍是麗晶的居民,如在麗晶花園偶然遇上,希望大家亦能與我打個招呼」。

相關字詞﹕公職人員 宣誓 深水埗 區議員 區議會選舉

上 / 下一篇新聞