港聞

港聞二

【Emily】前規劃署長重返政府 凌嘉勤任港深合作策略顧問

【明報專訊】近年港深合作成為重點議題,中央政府亦全力支持港深合作,建設大灣區國際科技創新中心。為咗融入國家發展大局,Emily得悉政策創新與統籌辦事處(PICO)最近聘請前規劃署長凌嘉勤「出山」重返政府,擔任「港深合作策略規劃顧問」,負責就港深跨境經濟帶全面發展嘅策略規劃問題,向特首林鄭月娥提供意見。

PICO:凌經驗豐富 直接委聘半年

據Emily所知,凌嘉勤噚日起正式擔任港深合作策略規劃顧問,PICO亦為佢準備好辦公室。Emily向PICO查詢呢個職位嘅職責、薪酬及有否公開招聘。PICO回覆確認,凌嘉勤自6月1日起出任上述職位,因應「十四五規劃」為香港帶來嘅經濟機遇,就全面拓展港深口岸經濟帶的規劃作研究並制訂策略;顧問一職以非公務員合約聘任,職位待遇與其退休前嘅公務員職位相若,即首長級薪級表第五點(D5)。PICO話,凌嘉勤喺策略性同地區規劃方面,擁有豐富專業知識同實踐經驗,今次係直接委聘佢出任此職,為期6個月。

凌嘉勤喺2012至2016年任規劃署長,2016年11月退休。佢退休後經常參與同規劃發展議題相關嘅工作,目前擔任理大賽馬會社會創新設計院總監,亦身兼唔少公職,包括房協副主席、漁農署轄下郊野公園及海岸公園委員會主席等。

上 / 下一篇新聞