港聞

港聞二

【Emily】還押李嘉達樂隊拍MV 監獄外取景

【明報專訊】觀塘前區議員李嘉達正因民主派初選案還押,以往唔多人知道佢有夾band、唱歌好聽,李嘉達facebook專頁噚日就出咗首歌《出走半生》,係由佢做主音嘅樂隊Forward創作,李嘉達負責填詞、主唱。歌曲簡介提到首歌喺2月開始製作,但因為李嘉達短暫離開而暫停;並提到李嘉達把聲仲係demo版本,「人總是以為會有再做好一點的機會」,佢哋希望將呢首歌「送給每位仍在掙扎中的香港人」。

《出走半生》嘅MV喺立法會、理大等地方,以及李嘉達身處嘅赤柱監獄外一帶取景,MV擺咗個咪係樂隊中間,主音位置留空。歌曲簡介提到,佢哋帶住歌曲同Forward嘅旗幟「去到最近他的山邊,希望他和與他一樣失去自由的人,能在那日片刻自由的時間,聽到《出走半生》這首歌」。

指訟費負擔重 尹兆堅考慮唔訂私飯

同樣因民主派初選案入獄嘅民主黨尹兆堅,其fb專頁更新,話現時訟費係佢最重負擔,唔希望成為家人壓力,正考慮要唔要取消訂購「私飯」,因為一個月價錢高達七八千元,佢希望「慳得一蚊得一蚊」。

陳皓桓:讀甘地文章感受深

另外,因前年10.1遊行案入獄嘅民陣召集人陳皓桓(Figo)話好忙,每日就係睇書、等探監、做運動、寫信等等,形容好充實,而近日天氣太熱,令佢開始出熱痱,加埋唔同品種嘅「小強」,令佢幾日都瞓唔到。Figo提到,最近睇到一篇有關甘地坐監嘅文章,話愈來愈多人因抗爭坐監,甘地覺得唔孤單;Figo都好有感受,因為遇到好多民主派朋友,大家見番都開心打招呼、精神唔錯。

相關字詞﹕赤柱監獄 還押 民主派初選案 陳皓桓 民主派初選 區議員

上 / 下一篇新聞