港聞

港聞二

【Emily】立會唞暑4周 8‧18就復會

【明報專訊】立法會過往7月中起就會休會,至10月先復會,議員一般都有長暑假。選舉制度修改後,嚟緊嘅立法會選舉會喺12月19日舉行,新一屆會期1月1日開始,加上有唔少法案要趕住審議,令立法會今年嘅暑假亦縮短。立法會噚日向議員提供嘅文件顯示,暑假前嘅立法會會議日期為7月21號,唞暑4星期後,8月18日就會復會,至休會前共有9次會議。呢屆立法會最後一次大會日期為10月20日,而9月22號星期三係中秋節翌日(公眾假期),立法會無會議。

最後大會日期10‧20

選舉安排令議員放暑假時間較以往大幅縮短,皆因《議事規則》訂明,每一個會議內嘅會議日期同時間,由立法會主席決定,而同一會期內連續兩次會議不得相隔多於6個星期。

立法會尚有多條法案需要處理,包括聽日首讀嘅《2021年醫生註冊(修訂)條例草案》,另外仲有多條法例要趕及喺今屆會期前處理,否則就要「推倒重來」,由下屆立法會重新審議。目前立法會審議緊嘅法案,包括垃圾徵費、電子煙及加熱煙規管、就窺淫罪立法等,政府亦將就限制查冊提交附屬法案等。

相關字詞﹕暑假 立法會

上 / 下一篇新聞