港聞

港聞二

【Emily】工聯會課程 390蚊學中共百年黨史 陸頌雄話唱K班菠蘿包班受歡迎

【明報專訊】工聯會業餘進修中心久唔久都有啲有趣課程,噚日工聯會喺facebook出帖推銷,Emily睇睇課程名單,的確包羅萬有,由語言、電腦、咖啡拉花課程都有,甚至有740蚊10堂嘅「卡拉OK訓練班」、190蚊一堂嘅「菠蘿包精選實習班」等。今年係中國共產黨建黨100周年,工聯會其中一個課程為「中國共產黨百年歷史專題班」,盛惠390蚊3堂;「中國國情(中國人民解放軍歷史與現况)研修證書課程」則要150蚊一堂。

陸:有時啲老師都會報讀

Emily請教過工聯會立法會議員陸頌雄,佢話國情班、歷史班呢啲都搞咗好幾年,解放軍課程可能係啲軍事迷較有興趣;又話一向都有涉及中國共產黨歷史元素嘅課程,有時啲老師都會報讀,希望有啲「雞精」資料咁話。至於其他有趣課程,陸頌雄話都幾受歡迎,例如「卡拉OK訓練班」主力教唱歌技巧,例如點樣用氣、唱啲真假音、震音等;菠蘿包班課程就長期受歡迎,因為學識後可以自己喺屋企整,好有滿足感喎。

疫情下面授課堂相對困難,陸頌雄都話有人對此有猶豫,雖然佢哋都有搞網課,但始終啲人會覺得似睇YouTube,冇咗真人示範、現場互動、社交活動呢啲元素,所以收生都有少少困難。

相關字詞﹕陸頌雄 共產黨 工聯會

上 / 下一篇新聞