港聞

港聞二

【Emily】北區鄉村設賣菜機 羅庭德常幫襯

【明報專訊】對於城市人而言,街市、超市同屋企都唔會距離太遠,買餸好方便,但對村屋居民而言就未必咁易。有公司早前喺沙頭角公路一帶設置「24小時蔬菜售賣機」,原來連北區區議會主席羅庭德都經常幫襯。佢同Emily講,住村屋如果出入冇私家車真係相當不便,舉例佢如果由粉嶺搭車返屋企,尾班車好早就開出,難以去超市買餸,村內甚至連士多都冇,但自從村口設置自動售賣機,佢就可以買沙律菜或者買啲瓜返屋企煮,暫時佢幫襯咗十幾廿次,話味道都正路。

氮氣包裝 蔬菜可保存5日

羅庭德喺facebook推介呢部售賣機,話自己去健身時行過就會想買沙律,形容「免洗即開即食有埋餐具同醬好方便」,話住沙頭角公路沿線有揸車嘅村民,有時收工遲咗又想煮飯,下次經過龍躍頭段停低選購吓,「有瓜有菜全部切好洗好」。根據fb專頁「Spark•撻著」介紹,售賣機以電子方式付款,蔬菜以氮氣包裝,可保存5日。

羅庭德話問過營運商,正常應該去大型屋苑、放喺會所或商場等地方會賺多啲,但對方對鄉郊地方有情意結,認為值得鼓勵。羅希望營運商可繼續做落去,好驚佢做唔住,亦希望有多啲唔同種類嘅嘢,「益吓我哋偏遠地方嘅蟻民」。

相關字詞﹕村屋 羅庭德 買餸

上 / 下一篇新聞