港聞

港聞二

【Emily】選委登記表要簽聲明反公投港獨

【明報專訊】中央及港府修改咗選舉制度,有關條例噚日正式刊憲實施。新制下選舉委員會組成大改,想參與就要重新填表登記,而選舉事務處嘅登記表格曝光,選委會「當然委員」份表格,要各人簽埋聲明,反對港獨、公民公投、自決等「負面清單」行為,同埋同意畀「候選人資格審查委員會」審核資格。

無差別反對政府議案屬違誓

選舉改制,選委會人數由1200增至1500,選民或當然委員都要喺7月5日前重新登記。選委會中有362席屬唔使選嘅當然議席,包括港區人大代表、政協委員、大學校長等,但佢哋一樣要填新表格確認資格。Emily睇過啲表格,當然委員要簽署誓言,擁護《基本法》及效忠香港特區。表格再列明違誓嘅負面清單行為,除咗唔可以支持港獨,話如果支持無差別地反對特區政府提出嘅議案,而意圖以此要脅特區政府,以及組織「變相公投」,都屬違誓。

按新規定,所有參選人,就算已屬選委當然委員,都要經候選人資格審查委員會審查資格。香港友好協進會會代人大及政協委員提交表格,先可以登記為當然委員。

相關字詞﹕港區國安法 港獨 選民登記 選舉委員會

上 / 下一篇新聞