港聞

港聞二

【Emily】應屆DSE考生 7.7%話「一定會打針」

【明報專訊】中學文憑試(DSE)結束,今屆考生除咗要諗升學路向,仲要考慮埋會唔會接種新冠疫苗。團體「青年新世界」上星期五(28日)透過電話問卷,訪問咗458名應屆DSE考生,4.4%話已打針,7.7%話一定會打,42.5%就話可能會。打算或考慮打針嘅受訪學生中,56.5%話傾向接種復必泰疫苗,傾向接種科興疫苗嘅就有24.1%。

逾六成寧願定期檢測

早前有幾間大學公布規定學生打針或每兩周檢測,如果唔係就無得住Hall,甚至無得返學上堂。唔知準大學生又點睇?調查顯示,支持同反對都係一半半,以反對略多,有49.6%;逾六成人話會選擇定期檢測。至於點解唔打針,最多人(74.9%)話擔心疫苗有嚴重副作用。

團體發現,較多受訪者傾向覺得如果打針後可方便外遊,會增加打針意欲,建議政府加強同周邊地區包括受年輕人歡迎嘅外遊地點,建立「旅遊氣泡」措施,等年輕人憑「疫苗護照」減少外遊同返港嘅防疫限制。

相關字詞﹕青年新世界 新冠疫苗

上 / 下一篇新聞