港聞

港聞二

【Emily】憂家人失經濟支柱 阿尹掉男兒淚

【明報專訊】民主派47人因組織、參加初選被控串謀顛覆國家政權,案件今日再提堂,當中36人已還押3個月。

民主黨尹兆堅除咗初選案,仲背負多項控罪,佢嘅fb小編噚日上載帖文,話民主派「10.1遊行案」判刑影響阿尹對自己案件嘅心情,雖然認為追求民主要付出代價,但作為家庭支柱嘅佢頓失收入,最擔憂家人仔女經濟情况,亦對太太、仔女終日為自己奔波感心痛,講完更流下男兒淚。

初選案被捕者之一、民協何啟明早前獲准保釋,雖然今日要再上庭,但佢工作依舊,噚日帶街坊去旅行,包括探小灣鱷貝貝、食米芝蓮餐廳,仲去埋香港文化博物館。

劉頴匡估中車仔趁佢坐監先封冠

英超球隊車路士噚日喺歐聯封王,前民間集會團隊發言人劉頴匡係車路士球迷,佢女友Emilia話劉頴匡相當興奮,又話劉較早前已自嘲,「話車仔會唔會趁佢坐監就攞冠軍,點知開口中」。Emilia話,雖然唔期望劉頴匡4年、8年後出得到嚟,但希望下次車路士再入到決賽,佢可以喺外面同大家一齊觀戰。

監房酷熱 仁哥漸適應

此外,民主黨何俊仁上周因為10.1遊行案入獄,監房酷熱令佢感到辛苦。黨友李永達噚日去探佢,形容仁哥瘦咗啲,但精神ok,頭幾晚太熱難入睡,𠵱家已適應,晚上11、12點瞓到凌晨4點,醒咗抹吓身再瞓多兩個鐘,仲話知道47人案今日再上庭,希望手足撐住。

相關字詞﹕民主派初選案 35+大搜捕 劉頴匡 10.1遊行 顛覆國家政權 串謀顛覆國家政權 尹兆堅 民主派

上 / 下一篇新聞