港聞

港聞二

【Emily】疫下高鐵站停開 變身本地遊景點

【明報專訊】隨住本港疫情緩和,政府上月底批准復辦唔多於30人嘅本地遊旅行團,其中因應疫情而關閉同停止運作嘅高鐵香港段車站亦成為「景點」。港鐵話,為咗支持本地旅遊業界,兼且與民同樂,決定免費開放高鐵西九龍站同石崗列車停放處畀旅行團參觀,噚日港鐵仲特別包團,由「新家園協會」協助安排,招待27個住喺油尖旺區嘅少數族裔街坊,參觀石崗列車停放處。

石崗列車停放處 開放參觀

高鐵職員化身導賞員,介紹列車停放處嘅設備同運作,等佢哋了解高鐵服務同特色,之後仲登上高鐵動感號,體驗車廂內各項設施;雖然高鐵列車無得開出,但唔少參觀嘅團員都喺動感號入面「打卡」留念。

港鐵話,由5月28號至6月20號一共安排咗30個時段,供本地遊旅行團參觀高鐵西九龍站同石崗列車停放處指定區域,希望疫情下可以有更多景點畀市民消閒。為咗保障遊客同職員,高鐵職員會為所有進入西九龍站同列車停放處嘅團員量度體溫,全程亦必須戴口罩。港鐵又話留意到噚日反應踴躍,會探討將來係咪可以有更多類似安排。

相關字詞﹕新家園協會 高鐵 高鐵停運

上 / 下一篇新聞