港聞

港聞二

【Emily】明年三個機會 連放至少9日假 農曆新年 勞動節 聖誕節

【明報專訊】打工仔請假攻略嚟嘞!政府公布2022年公眾假期「紅日」,當中除咗復活節4日假期由4月15日放到18日,出年嘅農曆年初一至三「紅日」係2月1日至3日,如果5天工作嘅打工仔請1月31日同2月4日兩日假,就可以「自製」9日長假期。萬一搶唔到呢個「黃金檔期」,5月1日勞動節係星期日,翌日補假,打工仔只要拎5月3日至6日假,變相請4日假亦可以連放9日。

聖誕請3日假可放10日

如果兩個「長假」都畀同事搶晒,年尾仲有機會。因為出年12月25日聖誕節正日係星期日,翌日補假連埋12月27日聖誕假期,如果打工仔爭取到12月28日至30日放假,加上2023年元旦係星期日,翌日又補假,咁即係請3日假就可以由12月24日放到第二年嘅1月2日,連放10日!

除咗呢3個潛在長假檔期,出年4月5日清明節係星期二,只拎到4月4日星期一放假,亦可以連放4日。

睇嚟出年要放個長假都唔係難事,不過疫情下可唔可以出門旅行,就未知。

上 / 下一篇新聞