港聞

港聞二

【Emily】話議辦已不存在 馮檢基告別支聯

【明報專訊】《港區國安法》下,支聯會成為敏感團體,近期相繼有區議員同團體退出,最新退出嘅包括民協前成員馮檢基。阿基日前向支聯會秘書蔡耀昌致函,同支聯會分手。阿基話近日收到唔少傳媒查詢,問佢「馮檢基議員辦事處」仲係唔係支聯會成員。阿基話2016年10月1日開始已唔係議員,「馮檢基議員辦事處」實質上同法理上已不存在,若果有人仍然公開使用「馮檢基議員辦事處」係失實,係唔應該,所以向蔡耀昌表明立場,話議辦「已不存在!煩勞之處,請諒!」

話傳媒問「馮檢基議員辦事處」

仲係唔係支聯會成員

除咗阿基,據《蘋果日報》報道,元朗區議會副主席麥業成亦因擔心「踩紅線」而退出支聯會,民主黨程張迎、公民黨陳琬琛同黎志強,與及梁耀忠等,之前亦已退出支聯會。

全國僑聯副主席盧文端日前撰文,提醒泛民從政者,唔單止唔好參加支聯會,仲應該盡快退出支聯會組織,以免斷送政治前途,形容呢個係善意嘅「溫馨提示」。

上 / 下一篇新聞