港聞

港聞二

【Emily】利君雅last day 派餅限半粒鐘 擾攘一輪先入到廣播大廈 保安全程監視

【明報專訊】香港電台助理節目主任利君雅噚日last day,最後一日喺港台返工,但Emily聽聞利君雅噚日去香港電台廣播大廈派「散水餅」時,保安員話「樓上落咗order」,唔准利君雅入廣播大廈,擾攘一輪,喺行政部人員監視下,利君雅先入到廣播大廈,但要限時半小時,其間保安員亦全程監視住。

Emily問港台咩事,港台回覆話Emily講嘅同事實不符,話一直按既定程序處理員工出入辦公大樓安排,無為個別員工施加額外限制。

工會感謝利君雅留守到最後

香港電台目製作人員工會喺fb貼圖感謝利君雅,寫住「在這政治凌駕專業年代,記者發問成原罪,感謝妳一直謹守崗位,為公義發聲,毋懼調查不公與打壓,留守最後!」

利君雅2017年10月入職港台,試用期3年,2019年7月喺政府記者會上問特首林鄭月娥7.21事件係咪「官警黑合演大龍鳳」,又叫林太「講人話」,之後收到投訴。港台起初調查話投訴不成立,但上年重啟調查,再先後延長利君雅試用期同開出新合約,上月通知利君雅不獲續約。

上 / 下一篇新聞