港聞

港聞二

【Emily】譚志源:公務員可以好積極不合作

【明報專訊】政府2002年推出「高官問責制」,之後改名「政治委任制」,政制及內地事務局前局長譚志源接受民建聯訪問時話係佢決定改名,又話當年有樣嘢做得「無咁好」,就係首批外來高官加入政府時,辦公室都喺西座,常務秘書長同其他公務員喺另一座,雙方好難即時溝通,「地理嘅距離,令心理上都有距離」。

爆當年有高官易同公務員「開火」

譚志源仲大爆,當年個別「外來同事」嘅性格或做事作風問題,耐性唔夠,好易同公務員開火,「無啦啦拍枱呀!」搞到啲公務員覺得好難溝通,索性唔同局長溝通,「(公務員)如果要積極不合作,都可以好積極不合作嘅」。

不過,做咗廿年政務官先轉做政治委任官員嘅譚志源話,好多公務員都好願意以大局為重、做好件事,亦正因為咁,好多公務員想確保程序公正、政策周全,同政策局長討論時,難免有啲局長覺得「救人如救火」而「心急啲」、有人就想穩陣啲,「大家都係良好意願」。佢仲話當年做局長時,每日同常秘、副局長同政治助理開會,討論每日、每星期要做嘅事,大家都有參與就唔會溝通不足。

相關字詞﹕公務員 政治委任制 譚志源

上 / 下一篇新聞