港聞

港聞二

【Emily】泰博想搞「虛擬議辦」 接聽市民電話

【明報專訊】立法會噚日通過修訂選舉制度,熱血公民鄭松泰(泰博)同日宣布,稍後會調整議員辦事處同地區事務嘅工作。泰博同Emily講,由於立法會選舉以往一般喺9月舉行,議辦租賃合約都差唔多時間完結,點知今屆立法會任期延長至年底,中間就有一段「尷尬位」,所以佢打算結束地區議辦後,轉為每周喺facebook做直播,接聽市民電話,處理求助同投訴。

泰博早前同Emily講,費事麻煩業主短暫延長議辦租約,所以打算搞虛擬議員辦事處。佢話作為議會內少數非建制派,多咗市民求助,喺網上接聽個案話唔定更有效,可以喺餘下任期幫到更多市民。不過泰博強調,今次調整同立法會選舉無關。

立法會前議員鄭經翰曾主持烽煙節目《風波裡的茶杯》,有「十點前特首」之稱,泰博笑言會唔會可以透過fb版烽煙節目,做大家嘅「深宵議員」呢?泰博噚日喺facebook出post,話遲啲會分享多啲消息,但話不時畀仇視佢嘅人嘲諷,佢只回應「在自己的崗位上直心,便是最大的行善」。

相關字詞﹕選舉制度 立法會 鄭松泰

上 / 下一篇新聞