港聞

港聞二

【Emily】何君堯質疑紅會退選委「政治表態」 泰博批上綱上線:退出突顯公平中立

【明報專訊】立法會噚日三讀通過修改選舉制度,其中一項修正案係紅十字會早前要求退出當然選委。立法會議員何君堯(圖)發言時就質疑,紅十字會要求政府剔除個名,「本身就係政治表態」。佢話選委名單不乏NGO、慈善團體,「好多人想爭落去都爭唔到,唯獨紅十字會將自己剔出嚟,係咩回事?」

何君堯強調,今次修例係堵塞選舉漏洞、防止反中亂港嘅人奪權,但紅十字會咁有地位、有學識嘅組織竟然咁都睇唔到,「紅十字會嘅表態令我更清楚,唔好以為有咁嘅地位,一定有咁嘅智慧,佢未必有」。

熱血公民鄭松泰發言時就批評何君堯上綱上線,強調紅十字會退出,絕對可以突顯佢係公平、中立、獨立嘅志願機構,係基於人道關懷,反問唔通「捐血時要睇吓啲血係咪藍色?」鄭松泰強調,並非坐喺選委位置先可以為國家貢獻,批評何君堯上綱上線可能獲得陣營中人嘅信任,但質疑係咪對香港整體有利。

中聯辦溫提議員準時開會

今次選舉修例一共兩日,噚日朝早9點續會。Emily聽聞中聯辦事前溫馨提示議員要準時開會甚至早啲返大樓,民建聯葛珮帆噚日朝早8點半已上載喺立法會地下餐廳食早餐嘅相,話要食個靚早餐,準備三讀通過法例、「揭開香港新一頁」。

相關字詞﹕修改選舉制度 何君堯 立法會議員

上 / 下一篇新聞