港聞

港聞二

【Emily】今年悼六四違法? 羅致光:犯法嘅嘢都係犯法

【明報專訊】今年係六四事件32周年,喺建制派批評支聯會綱領「結束一黨專政」違法聲音下,未知燭光集會能否舉行。勞工及福利局長、民主黨前成員羅致光過去多年都有參加六四集會,佢噚日出席立法會會議後被問到市民今年出席集會會否違法,佢話「無需要答」;記者追問今年悼念六四係咪違法,佢話「所有犯法嘅嘢都係犯法」,並將手擺喺心口,話自己過去多次參加嘅都係合法集會。

建制派議員何君堯喺2017年對「毋忘六四,平反八九民運」議案投下贊成票,佢噚日形容「經過時間嘅洗禮,同好多事實出嚟」,見到1989年事件唔係普通學生運動,而係顏色革命、有外國勢力推波助瀾,「我百分之九十認同呢個講法」。但佢話參加八九民運嘅學生希望政府清廉,將國家愈搞愈好,呢種情懷同思想好純品,值得認同,佢支持學生不忘初衷,值得表揚,故2017年支持動議。

何君堯:講「平反六四」不犯法

被問到現時講「平反六四」會否犯法時,本身係律師嘅何君堯話「唔會」,因為香港仍有言論自由,只要唔係作煽動言論「絕對無問題」,佢話《港區國安法》係針對奪權、推翻中央或特區施政嘅行為;又話如果今日再有平反六四議案,佢會修訂。

相關字詞﹕結束一黨專政 何君堯 羅致光 六四集會 支聯會

上 / 下一篇新聞