港聞

港聞二

【Emily】林鄭「世侄」 區選輸畀陳梓維 葉傲冬將做政制副局

【明報專訊】政制及內地事務局前副局長陳帥夫2月以個人健康理由辭職後,有關職位一直懸空,Emily聽聞,局長曾國衞最近覓得副手,人選係曾任油尖旺區議會主席嘅民建聯副秘書長葉傲冬(圖),據聞程序已去到最後階段。Emily向葉傲冬查詢,阿冬僅稱會專注現時工作,如果有任何崗位認為佢係適合,佢都願意去承擔同嘗試。

修改選舉制度嘅法案預料今日通過,政制局未來一年工作仍繁重,包括未來大半年要舉辦選委會、立法會及特首3場選舉;立法會亦正審議「起底」刑事法嘅建議。

40歲嘅葉傲冬現時喺《文匯報》擔任助理總編輯,行會成員、民建聯嘅葉國謙係佢伯父。佢喺2008年區會補選中開始擔任油尖旺區議員,2016年做埋區議會主席,喺2019年區選中輸咗畀素人陳梓維。

現屆政府6民建聯成員

特首林鄭月娥早前主持《選委界別分組面面觀》訪問擔任油尖旺南分區委員會成員嘅阿冬時,林太就稱呼佢為「世侄」。

現屆政府中已有6名民建聯成員做政治委任官員,包括民政事務局長徐英偉、其政治助理張進樂;財庫局長許正宇、其政治助理葉俊廉等。葉傲冬將做副局長嘅同時,政圈就有傳政制局政治助理吳璟儁或會辭職,Emily向吳璟儁查詢,對方未有回覆。

相關字詞﹕葉傲冬 政制及內地事務局

上 / 下一篇新聞