港聞

港聞二

【Emily】屯馬線揭車站主色 網民關心幾時通車

【明報專訊】港鐵屯馬線將會喺今年第三季通車。港鐵噚日喺facebook發文,分享3個即將啟用嘅屯馬線新車站主色,其中宋皇臺站採用黃色,土瓜灣站採用藍色,紅磡站就採用紅色。港鐵解釋,車站主色主要係取材自站名,紅磡站直接以車站名稱「紅」字作為主色,宋皇臺站就因為「皇」字嘅粵音同「黃」同音,因此用咗黃色;至於土瓜灣站就因為「灣」字同水相關,因此用咗藍色。港鐵喺文中話,「你的名字如何,你的樣子也必如何」。

港鐵又話,喺揀選車站顏色時,相鄰車站亦會採用有明顯對比嘅顏色,等市民搭車經過時易啲辨別。

話土瓜「灣」同水相關遂用藍色

不過,有部分網民留言,關注屯馬線幾時通車多過車站顏色,又話港鐵搞咁多嘢,「不如快啲通車好過」。有網民就話,第一眼睇宋皇臺站隻顏色,覺得似黃大仙多啲;亦有網民表示唔理解點解土瓜灣站採用藍色,話「灣發同藍點聯想?請指教」,更有網民發揮創意,指土瓜灣嘅「土瓜」兩字,意思等於番薯,建議車站可以採用紫色同橙色兩種顏色咁話。

上 / 下一篇新聞