港聞

港聞二

【Emily】阿臻:等落雨快過等懲教署長回覆

【明報專訊】連日天氣炎熱,立法會前議員邵家臻早前收集到逾10萬個簽名,希望懲教署以人道理由,可以新增預防中暑物資等,至今懲教署對佢提出會面要求未有回覆。噚日朝早落過雨,阿臻形容「等落雨快過等懲教署署長回應開會安排。天可憐見,暴雨令監房降溫」;佢又提到噚日下晝去咗羅湖懲教所探女手足,對方亦談及監房之熱,包括女囚友一年到晚都要著長褲,亦唔准摺高褲腳,只能夠喺職員睇唔到時勉強偷雞一陣。

女囚友只可著長褲 唔准摺褲腳

阿臻話,羅湖懲教所運動場原來噚日先開始有4把太陽傘供囚友避暑;雖然倉內有裝牛角扇,但唔少都有欠維修,得物無所用。佢形容熱到生熱痱係普遍現象,最麻煩係熱痱惡化成風癩等;又指懲教所仍然只提供熱水飲用等。

另一邊廂,屯門區議員朱順雅噚日喺facebook提及民主黨何俊仁嘅狀况,佢形容對方噚日「好精神」,因為之前連續7日都無剃鬚,而佢終於收到鬚刨,噚日朝早一次過刮得乾乾淨淨;加上連續兩日都有雨,收押所亦稍降溫,形容仁哥成個人企理番晒。佢又引述仁哥感謝大家關心,一定會撐住咁話。

仁哥7日無剃鬚 終於有鬚刨

民主黨劉慧卿噚日探完黨友楊森後就話,對方精神好,但表示好熱。

上 / 下一篇新聞