港聞

港聞二

【Emily】儲收據備安心 迎第二輪「賞你遊」

【明報專訊】旅發局上年11月推出第一輪「賞你遊香港」,推行無幾耐就因為第三波疫情而中途暫停。好唔容易香港疫情終於緩和,旅發局噚日宣布推出第二輪「賞你遊香港」活動,名額仲加碼到2萬個。市民即日起喺本地零售同餐飲商戶實體店消費滿800蚊,就可以儲起機印收據,下星期二開始可憑收據向參加活動嘅旅行社報名,換取本地遊名額一個。

旅發局話,新一輪「賞你遊香港」提供大約190個唔同本地旅行社設計嘅行程,包導遊服務、來回交通、一餐膳食同埋基本保險,會到訪至少兩個景點,最快6月頭就會出團喇!所有團友都要遵守最新社交距離措施,上交通工具同埋進入景點同食肆要掃描安心出行二維碼。

縱橫遊常務董事袁振寧就同Emily率先分享佢哋公司嘅賞你遊行程,會帶人遊覽中環大館、文武廟、上環海味街,同埋去太平館餐廳食懷舊午餐,第一團6月頭出發。袁振寧話一間旅行社只有一個行程,名額100人,加上免費,估計反應都會熱烈。

相關字詞﹕縱橫遊 旅發局 賞你遊香港

上 / 下一篇新聞