港聞

港聞二

【Emily】八旬董生籲打針:有問題call我 即黎睇你

【明報專訊】年過80歲嘅首任特首、全國政協副主席董建華,早前同太太一齊接種科興疫苗。董生噚日出席「香港再出發大聯盟」活動時,呼籲公衆盡快打疫苗,多次強調「真係一啲都冇事……若果有問題,打電話畀我,我即刻來睇你」。

譚Sir溫提:好似你想呼籲大家……

董生噚日發言先講關於大聯盟嘅嘢,講完一輪後望向坐喺隔籬嘅全國人大常委譚耀宗(譚sir),譚sir此時溫馨提示,話「好似你想呼籲大家接種疫苗喎」。董生立即心領神會,話自己80幾歲,第一批響應呼籲去打疫苗,「董太乜嘢都唔肯做,但佢話呢次一定陪你去做(打疫苗)……不過話畀大家知,真係一啲都冇事,真係一啲都冇事,你哋真係去啦,冇事嘅」。再講多兩句,董生就話自己唔講太多喇,笑言董太成日投訴自己「長氣」。

噚日董生發言時,提起去年5月成立大聯盟,一度望住份稿停咗5、6秒,台上部分嘉賓都不禁望住董生;當司儀介紹董生時,譚sir撳一撳董生手臂,似乎叫佢唔使起身,但董生堅持撐住張枱慢慢企起,譚sir就變扶一扶董生手肘。

相關字詞﹕香港再出發大聯盟 疫苗接種計劃 董建華

上 / 下一篇新聞