港聞

港聞二

【Emily】范國威退黨不再參選 退出政壇陪家人

【明報專訊】民主派初選案36人仍在還押,新民主同盟創黨成員、立法會前議員范國威(Gary,圖),噚日宣布退黨,「此舉亦代表我正式退出香港政壇,不會再發揮政治影響力及參與各級選舉」,希望喺僅餘嘅日子陪伴太太、女兒,並照顧本身有長期病患嘅家人。Gary慨嘆「歸來無期,未能克盡黨員責任,歉咎(疚)萬分,猶盼體諒」。

除咗Gary,新同盟兩名同因初選案而還押嘅成員譚凱邦、鍾錦麟,早前亦已退黨。另外,西貢區議員梁里亦向Emily確認,上月已退出新同盟,原因係「私人理由」。

失一半區議員 新同盟:唔會歸咎前黨員

新同盟輪任召集人任啟邦向Emily話,對Gary嘅決定感尊重、無奈,一來唔知Gary要坐幾耐;二來新同盟成立之初,Gary已係重要角色,大家多番經歷起跌。任啟邦話,該黨損失咗一半區議員,由18人跌至現時9人,對黨嘅工作、發展都有影響,但佢唔會歸咎任何退黨、辭職嘅同事,認為現時政治環境下,應該以自己同家庭考慮為先。

另外,黃大仙區議員鄭梓健噚日宣布辭職,佢facebook嘅封面圖片係「我們唯一需要恐懼的,是恐懼本身」,但佢噚日話眼見手足被入獄,宣誓更似利劍掛喺頭上,「最終都係敵唔過恐懼」。

上 / 下一篇新聞